「感激可以受浸，好想分享神喺我生命所經歷嘅事情。大約一年半前膝頭哥的病患，令我想起要做手術，但當時心情又好忐忑、好驚又好唔平安，當時神安排阿女又再邀請我返教會。

 

呢次我開始認真起來，原來「擔心」係唔洗一個人去承受，只要信耶穌，就可以將重擔交比神，只要坦白講出來、去祈禱，神就會賜平安比我，令我有信心同勇氣去面對手術；仲記得做手術前在病床上祈禱嘅情況，最後膝頭哥手術好成功，好快就復原行得番，開開心心咁返教會！

 

相隔十個月之後，一次身體檢查發現有乳癌，簡直係晴天霹靂，又再一次擔心、好驚慌！幸好返咗教會有一段時間，明白唯有謙卑起來，唔依靠自己去依靠天父，神就會比出人意外嘅平安同出路我，喺神嘅保守之下再一次做手術，感激神同身邊嘅弟兄姊妹嘅代禱，癌症沒有擴散，手術成功，逐步康復起來！呢兩次大手術如果沒有神喺我心裡面，我相信我無勇氣去面對！

 

另外，我仲記得以前阿女想邀請我睇佢受浸，我無反對佢，但我亦無理會佢，今日我終於明白，原來信神係幾咁開心！做每件事，神都喺我身邊，提醒我唔使驚、唔使怕，值得感恩！當我繼續查聖經，明白耶穌為我嘅罪釘十字架，為我犧牲，令我好感動，決定悔改受浸成為基督徒。嚟緊做基督徒好想學習更加多聖經，去幫身邊嘅人認識神。我亦非常感激我個女阿玉帶我返教會認識神，身邊姊妹對我嘅關懷，Janet 好耐心教導我睇聖經、林林、屏姐、張太陪伴我、關心我！感謝教會好似大家庭咁、相親相愛，有好多好多的愛！」

 

分享：琴姐(Kian 姊妹的媽媽)